Martin Luther Christian University

Ka Jingnoh Synniang bad ki Jingshisha jong ka MLCU

- Da ki nongpule barim jong ka MLCU

Don ki khubor kiba la mih halor ka kyrdan bad jinglong jong ka Martin Luther Christian University bad ka kynrum kynram kaba la mih na ka daw ka jingkdew bymdei na ki katto katne shaphang ka jingbymbiang ka rukom trei kam hapoh kane ka skulbah. Kane ka la pynmih ka jingsngewthuh bakla bad kaba pynkulmar jingmut ia ki khynnah pule, ki kmie ki kpa bad ia ki paitbah baroh.

Ka long kaei kaei kaba sngewsih ba kum kane ka skul bah kaba dang khie dang san bad kaba la roi stet wat la ka ‘yrta ka dang khyndiat (5 snem) ka la hap ban shah khmih shin bad peit bniah, kata ruh ha ka dur jong ka jingibein, jingpynrem bad jingpynduh jingkyrmen kaba thmu sha kaba pynkulmar pynban, imat shaduh u pud ban pynduh bad khang syndon ia kane ka skul bah.

Dei halor kane, ba ngi ka kynhun jong ki nongpule kiba la pass na kane ka skul bah (Alumni) ngi sngew ba na ka liang jong ngi, ngim lah ban shu sngap khlem da kdew katto katne ki jingshisha kiba lah ban pynshai ia u paidbah, ki khynnah pule jong ka MLCU bad kumjuh ia ki kmie ki kpa jong ki shaphang kine ki jingkynnoh ba khlem nongrim.

Ha ka jubab ia ka RTI kaba iit bniah shaphang ka kyrdan jinglong jong ka MLCU, ka UGC ha ka 15th Febuary, 2008 ka la pynshai ba ka MLCU, Shillong ka dei ka Private University ia kaba la ai jingbit bad seng da ka Act of Legislature, Meghalaya bad la pynkup bor ruh ha ka ban ai ia ki degrees kumba la kdew shai hapoh ka Section 22 jong ka UGC Act, 1956. Kane ka skul bah kam dei satia kaba shu pynthame lane shu thok.

Ka kynhun ki san (5) ngut kiba la wan mihkhmat na ka UGC ki la khmih bniah ia kane ka skul bah ha ka 15-16 April, 2008 ha kaba la don ki jingai jingmut kiba lah  ruh ban shem ha ka website jong ka UGC (www.ugc.ac.in). Ia ki jingai jingmut kiba kongsan tam kiba la ai da kane ka kynhun la nang pyndep bad pynbiang. Kumta ka long kaba bakla ia kino kino ki briew ne kynhun ban iatih nia halor kane khlem da tip lut ia kine ki jingshisha. Ha ka 15th March, 2011 ka MLCU ka la phah ia ka kaiphod jong ka jingpynbiang (compliance report) sha ka UGC. Ha ka 22nd March 2011 ka UGC ka la bthah ia ka MLCU ban pynthymmai (update) ia ki jingtip kiba iadei bad kane ka skulbah (Directory), bad ka la air uh ia u University Code (284) ia kane ka Skulbah. Ka don ka  jingiadei kaba jan hapdeng ka UGC bad ka MLCU lyngba ki jingthoh jingtar bad ki shithi, ki jingpynbna (notification) bad kiwei kiwei.

Te ka jingkylli ka mih – lada ia kane ka skulbah ym shim la ithuh da ka UGC, kumba la pynsngewthuh bakla da ki katto katne, kumno ka MLCU ka ioh ia une u University code? Ka long ka bym lah ban pdiang ba ki briew kiba la nang la stad kin pyrshang ban pynhiar kyrdan ia kane ka skul bah. Lada kane ka skulbah kam shym la pynmih ia ki soh kiba thiang, kiba la lah ban noh synniang sha ka imlang sahlang lane kam shym la sei ia ki sap kiba tbit bad ki jingstad ha la ki jong ki jong ki bynta kumba la khmih lynti, to niuma lah dei ban pan jubab bad ia ka jingkitkhlieh na ka bynta ka jingbymlah jong ka. Pynban, ki nongpule ki ba lait na lane ka skulbah ki long ki sakhi ki ba khlain kiba pynshisha aiu ki lah ioh na ka. Kine ki lah ban rung ha kiba bun ki jingtrei la ka long ha ki kam sorkar ne kiwei kiwei bad ym shim la don satia kata ka ban ong ba kin shah kyntait namar ki lait na kane ka skulbah.

Kawei ruh kaba ngi lah ban kdew hangne ka long ba ki nongpule kiba la dep pule hangne ki la lah ban pass ia ka NET/JRF eksamin kaba la pyniaid da ka UGC. Te kumno kein ka lah ban long ba ka UGC kam ithuh ia ka MLCU haba ki khynnah kiba pass na MLCU ki lah ioh ia ki NET/JRF certificates na ka UGC? Shuh shuh, kumno ia ki khynnah jong kane ka skulbah kiba leit pule Ph.D ha ki central universities la ai bai bam (scholarship) da ka UGC?! Kumno hi ruh ki Central University ki pdiang ia ki lada ia ka MLCU ym shim la ithuh da ka UGC?

Ngi kwah ruh ban pynpaw hangne khyndiat ki jingshisha halor ki nongpule barim ba lah pyndep na kane ka University.  Mangcha Touthang, (Social Work Department) ba bat UGC-JRF bad dang leh PhD ha Mizoram University; Ingenuity Swer (Performing Arts), ba bat UGC-JRF bad dang leh Ph.D ha MLCU;  kiba lah pyndep ia ka NET ki long Wadahun Kharlukhi, Vunghauniang, bad  Iaikymaw Buam; Parama Deb, iba la register PhD ha Nirmala Niketan, University of Mumbai; Darinylla Icarias & Larisa B Hynniewta,  kiba dang pule MSW ha Alvas College bad St. Aloysius College, Mangalore University;  Kamzason, MA  Life Skills,  Rajiv Gandhi Institute of Youth Development, Chennai;  Ibanrishisha, MSW,  Madras Christian College; Bala Pynkmen Shadap,  Lecturer,  Dept. of Music, St. Anthony’s  College; Priyo Laloo & Senjistar Nongkynrih, Jaintia Percussion Instructors, Dept. of Arts & Culture, Govt. of Meghalaya; Banrapborlang Marwein, Ailadshisha Lyngdoh, Ibakorlin Nongsteng,  Esterlin Mawthoh (MLT) NEIGRHIMS;   Bishar Malang (MIT) NEIGRIHMS;  Carefully Tiewsoh  (MLT) NRHM, Kamal Hasan (Optometrist) GMC, Assam; Isable Kurkalang (MLT) & Banshembha Kharumnuid (MIT) Civil Hospital, Shillong;  Lambha Nongkhlaw, Data Manager, Sanjib Iswary, Dist. Mobiliser, Deigratia Pakyntein, Christi Najiar & Virginia Malngiang, Adolescent Counselors, NRHM; Tzuden Wati, Research Faculty, Mahatma Gandhi Centre of Social Work, IGNOU, Nagaland; Imlitula Jamir,  Akuovinuo, Land Resource Dept. Govt. of Nagaland; Reuben Hangshing & Lalditpui Hmar, Counselors,  ICTC, Govt. of Manipur. Kane kam long kaba kut hynrei ka pyni tang khyndiat na ki jingjop jong ki khynnah ba lah pyndep na kane ka University. Ia ki jingtip ba kham bniah ia kiwei kiwei ki nam bad jingjop lah ban ioh jingtip bad jingshisha da mano mano kiba kwah ban tip shaphang ka MLCU. Ngi sngew sarong ban iathuh sha ka pyrthei ba ngi ki khynnah pule barim jong kane ka University ngi trei ha kiba bun ki kam Sorkar bad ki seng bhalang ruh ha baroh ki jylla ka Ri Shatei lam Mihngi bad sha kiwei ki bynta ka Ri ruh.

Wat mynta ruh don na ki ba lah pyndep nangne ki dang leit pyntbit shuh ia ki jingpule  Post Graduate sha kiwei ki jaka pule:  MBA ha NEHU, Army Institute of Mangement and Technology, Guru Gobind Indraprastha, Nagaland University, Bangalore University, West Bengal University of Technology; MA in Gender Studies, Pune University kiba long tang khyndiat. Ka long kaba myntoi shuh shuh ban pynpaw ia ka jingshisha ba 8 ngut na ki khynnah MLCU napdeng ki 1000 ngut kiwei pat ki khynnah ha ka Ri kiba ioh ka UGC Merit Scholarship (Shillong times tarik 25 Jymmamg 2011). Bun na ki khynnah ba la pyndep ki la ioh kam Sorkar bad bym dei Sorkar (NGO) ruh, kum ha National Rural Health Mission,  State Civil Hospitals, Central & State Govt. Hospitals, Mission Hospitals, Social Welfare Departments, State Aids Control Societies, Indian Council of Social Science Research, Central Universities, ICTCs, Christian Medical Association of India, North East Diagnostic Centre, schools and colleges, etc. kum ki Counselors, Programme Managers, Coordinators, CDPOs, Medical Lab Technologists, Medical Imaging Technologists, Surgical Technologists, Medical Social Workers, Lecturers, Research Assistants, Supervisors, bad kiwei kiwei. Kine ki samla kiba la pyndep ia la ki jingpule jong ki ka la ioh ban rung kam bad bteng ia ki jingpule jong ki ha kiwei ki jaka pule bad jaka trei khlem don kino kino ki jingeh.

Kum ki nongpule kiba rim jong ka MLCU (alumni), ngi long ki Sakhi kiba lah ban sakhi da ka jingsarong ia ka jinglong ba lah ban shaniah bad ia ka jinghikai ka ba bha bad kaba janai ba kane ka skulbah ka la ai ha ngi. Da ki spah ngut ki khynnah ki la lait na  kane ka skulbah  bad da ki spah ngut ki dang don ha ki jingpule jong ki.

Kumta kine ki nongpynbudnam kiba don ia ka jingstad bad jingshemphang kaba kham kyrpang ne khyllah, lehse ki lah ban wan bad ai jingmut thymmai kumno kane ka skulbah ka lah ban ai jingnang jingstad kaba kham paka shuh shuh, lane ka lah ban long ba ki don ei ei sha lyndet ba ki kwah ban leh kyrpang na ka bynta ki nongpule, bad na kata ka daw ki long ki nongpynwit bad nongpynthut. La khmih lynti namarkata, ba haba stad ban kyndang ia ki jingduna, dei ruh ban kham stad ban ai pat ia ki lad ban pynbeit ia kita ki jingduna. Te lada ki don kum kata ka jait jingstad, ngin da sngewnguh shibun lada ki wan shakhmat ban pynbeit ia kane bad wanrah ia ka jingbha ym ban wanrah ia ka jingkulmar bad jingsngewthuh bakla namar ym ju wan jingbha na kine ki rukom leh biej kiba ka jingthmu ka long tang ban pynlehrain pynbudnam bad pynhiar kyrdan iano iano.

Ka MLCU ka minot thop ha ka ban bet ia u symbai uba  bha bad ban phrung ia ki symboh jinghikai ki ba janai da kaba ailad ia ki nongpule ba kin mad da lade (experiential learning) ia kiei kiei ba ki dei ban sngew thuh khnang ba kin lah ban pyntreikam janai ia kine ki jinghikai ha ki jingim jong ki.

Ia ka jingpynthohbria ia ka MLCU, yn ym lah ban pdiang tang namar ka jingpynsngew thuh bakla bad ka jingbymtip bha, ka jingbuhshun, ka jingshukwah thad madan, ka jingbymshisha ne na ka bynta kano kano ka daw ba tang kine kiba pynthohbria ki kham tip bha, namar  kum kine ki kiei kiei ki jingjia khyllah ki mih ha ki por ba rung skul ki khynnah (admission) lane ha ki por ba ka MLCU ka ioh jingithuh bad jingiaroh ha kano kano ka bynta. Ka MLCU wat hapdeng kine ki diengpynkiang ka la lah ban sei ia ki samla ba stad bad kiba lah ban ai ia ka jingshakri ba janai ia ka imlang sahlang ha kiba bun ki liang.

Kum ki dkhot jong ka Alumni Forum, ka long kaba isaitmet ban iohi ia ka jingpynkhleh politik ha ka skul pule khamtam ha ka ba iadei bad kane ka skulbah jong ngi. Lah ban ong ba kane ka long tang ka jingpynshisha ia kato  ka jingong  ba “U Dieng uba sei soh khambun u khring ruh bun ka jingshah kawang maw.” Ka jingkyrpad ka long tang kane – ba phin ym ktah bad pynthud ia ki nongpule lada phi don shisha ka jingmut ka ba bha na ka bynta kane ka skulbah. Ngi ka Alumni Forum ruh ngim kwah ban ia kyrsum lang ha kano kano ka jingkawang ktieh jong phi bad phim don hok ruh ban khanglad ia ngi ba ngin iaid shaphrang ban kiew ia ki kyrdan jingstad, bad ka jingthrang jong ngi ka long ban Phyrnai ha ka Jingtyngshain jong ka Jingshisha!!!

Sd/- President

MLCU ALUMNI FORUM

Email: This e-mail address is being protected from spambots. You need JavaScript enabled to view it , This e-mail address is being protected from spambots. You need JavaScript enabled to view it

Address: Martin Luther Christian University

KJPA Conference Centre, Central Ward

Shillong – 793001